മുഴുവൻ സമയവും അന്നദാനം നടക്കുന്ന ക്ഷേത്രങ്ങളിൽ ഒന്നാണ് കണ്ണങ്കോട് ക്ഷേത്രം. ഉത്സവ ദിവസങ്ങളിൽ വൈകിട്ട് നടക്കുന്ന ശീവേലി എഴുന്നള്ളിപ്പും വിളക്കും ഭഗവത് സാന്നിധ്യത്തിന്റെ നേർക്കാഴ്ചയാണ്. എട്ടാം ഉത്സവ ദിവസം രാത്രിയിൽ നടക്കുന്ന കള മെഴുത്തും പാട്ടും സർപ്പ ദൈവസാന്നിധ്യത്തിന് ഏറ്റവും വലിയ തെളിവാണ്. പ്രത്യക്ഷ നാഗദൈവങ്ങൾ നിറഞ്ഞൊടി അനുഗ്രഹ വർഷം ചൊരിയുന്നതാണ് കള്ളമെഴുത്തും പാട്ടും. ആയിരക്കണക്കിന് ഭക്തജനങ്ങളാണ് ഇതിൽ പങ്കെടുക്കാനായി എത്തിച്ചേരുക. അതുപോലെ ഒമ്പതാം ഉത്സവ ദിവസം വൈകിട്ട് നടക്കുന്ന ചന്ദ്രപ്പൊങ്കാലയും തുടർന്നുള്ള മഞ്ഞ നീരാട്ടും ഈശ്വര വിശ്വാസത്തിന്റെ നേർക്കാഴ്ചയാണ്. മഹാ തൈപ്പൂയ ദിവസം രാവിലെ വെട്ടിക്കവല മഹാക്ഷേത്രങ്ങളിൽ നിന്നും കാവടി ഘോഷയാത്ര ആരംഭിക്കും. വേലുകൾ ശരീരത്തിൽ ധരിച്ച നൂറുകണക്കിന് സ്വാമിമാരും പീലിക്കാവടികളും ഭക്തിയുടെ ഉന്മാദലഹരിയിൽ ഉറഞ്ഞുതുള്ളി ക്ഷേത്രത്തിൽ എത്തിച്ചേരും. കാവടി ഘോഷയാത്ര ദർശിച്ച് സായൂജ്യമടയുന്നതിന് വേണ്ടി നാടിന്റെ നാനാഭാഗങ്ങളിൽ നിന്നും ആയിരക്കണക്കിന് ഭക്തജനങ്ങളാണ് എത്തിച്ചേരുക. അന്നേദിവസം വൈകിട്ട് 7 മണിക്ക് അഗ്നിക്കാവടി നടക്കും 10 ടണ്ണോളം പ്ലാവിൻ വിറകാണ് ഇതിനായി വേണ്ടി വരിക. കഠിന വ്രതത്തിലൂടെ ആത്മസമർപ്പണം നടത്തുന്ന അഗ്നിക്കാവടി ദർശിക്കുവാൻ 10000 കണക്കിന് ഭക്തജനങ്ങൾ ക്ഷേത്രത്തിൽ എത്തിച്ചേരാറുണ്ട്